Hlíðarvatnsdagurinn 10. júní

Hlíðarvatnsdagurinn, sunnudaginn 10. júní

Hlíðarsel Ármanna

Hin árlegi Hlíðarvatnsdagur í Selvoginum verður sunnudaginn 10. júní. Þennan dag bjóða veiðifélögin við vatnið öllum sem vilja að veiða í vatninu á endurgjalds. Að venju munu félögin taka á móti gestum og það verður örugglega heitt á könnunni hjá þeim öllum, þ.e. Ármönnum, Stangaveiðifélaginu Stakkavík, Stangaveiðifélagi Hafnarfjarðar, Stangaveiðifélagi Selfoss og Árblik.

Gestum í Selvoginum verður heimil veiði frá morgni til um kl.17 þennan dag og eru veiðimenn hvattir til að koma við hjá einhverju félaganna, leita sér upplýsinga um fengsælustu staðina, flugurnar og auðvitað skrá afla sinn í veiðibækur í lok dags.

Þrátt fyrir það sem kallað hefur verið óhagstæð tíð frá opnun í sumar, þá hafa aflabrögð verið með ágætum það sem af er og hátt í 700 fiskar færðir til bókar hjá félögunum við Hlíðarvatn.

Aðeins örfáar stangir eru lausar hjá Ármönnum í júní (sjá hér) en eitthvað meira laust í júlí, ágúst og september. Lausar stangir Ármanna eru seldar á LEYFI.IS og áhugasamir eru hvattir til að kíkja á lausa daga og sérstök athygli er vakin á lækkuðu verði í júlí, ágúst og september.