Fréttir frá Ármönnum

Stjórn Ármann sendir félagsmönnum sínar bestu kveðjur í upphafi árs. Síðari hálfleikur vetrarins í félagsstarfinu að hefjast, annasamur og fjölbreyttur að venju.

Fyrst ber að telja að framboðsfrestur til sætis í stjórn Ármanna og frestur til að skila inn tillögum að lagabreytingum rennur út n.k. miðvikudag, 15. janúar. Eitt sæti losnar á aðalfundi félagsins sem haldin verður 11. mars. Skila ber framboðum og lagabreytingum skriflega til stjórnar, með tölvupósti eða skilaboðum hér á síðunni.

En það er fleira sem ber upp á 15. janúar. Þann dag hefjum við móttöku umsókn veiðileyfa í Hlíðarvatn í Selvogi. Líkt og undanfarin ár verður ferlið rafrænt á heimasíðu okkar og verður kynnt rækilega á fundi í Árósum þann 15. Þeim sem óska aðstoðar við umsóknir er bent á að hana verður hægt að fá í Árósum 20. 27. og 31. janúar, en þann dag rennur umsóknarfresturinn einmitt út. Afgreiðsla umsókna fer fram 5. janúar og fljótlega upp úr því ættu veiðileyfin að birtast í heimabanka félagsmanna. Eins og endranær er skilyrði fyrir afgreiðslu umsóknar að viðkomandi sé skuldlaus við félagið, þannig að það er gott að hafa í huga að greiða útsendar kröfur félagsgjalda fyrir 2020 fyrir 5. febrúar. Að þessu sinni verður aðeins Hlíðarvatn í Selvogi í forúthlutun hjá félaginu, en ekki er loku fyrir það skotið að önnur svæði komi til sölu hjá okkur áður en vorar. Verður það kynnt nánar í lok febrúar.

Þorrablót Ármann fer fram laugardaginn 25. janúar og hefst að vanda kl.19:00  Þegar er farið að taka á móti skráningu á blótið á heimasíðu okkar (sjá hér), en vitaskuld má einnig bóka sig með því að senda félaginu tölvupóst. Frestur til að skrá sig á Þorrablótið er til 22. janúar. Þótt glæsilegt félagheimili okkar rúmi fjölda gesta, þá er betra að tryggja sér miða í tíma.

Starfið að vetri í nýju ári verður að mestu með hefðbundnu sniði, Skegg og skott verða að vanda vel flest mánudagskvöld og ef að líkum lætur verða þau jafn vel sótt á nýju ári eins og þau voru fyrir áramót. Fjöldi félagsmanna og gesta hafa mætt það sem af er vetrar og margir nýliðar stigið sín fyrstu skref í hnýtingum þessi mánudagskvöld. Á komandi vikum hyggst félagið koma enn frekar til móts við byrjendur með leiðsögn í fluguhnýtingum á mánudögum sem vonandi verða til þess að gestir félagsins taki ástfóstri við og fái mátulega þráhyggju fyrir fluguhnýtingum.

Fram til vors verða regluleg fræðslukvöld á miðvikudögum og verður efni þeirra auglýst nánar þegar nær þeim dregur. Nokkra veiðistaðakynningar eru í farvatninu þar sem félagar og gestir segja frá völdum veiðistöðum og fara yfir nokkur praktísk atriði sem gott er að hafa í huga á veiðislóð.

Sú nýbreytni verður að kvöldi 6. mars að látið verður reyna á víðtæka þekkingu Ármanna þegar efnt verður til FishQuiz í Árósum. FishQuiz sækir fyrirmynd sína í BarSvar (PubQuiz) þar sem einstaklingar eða smærri hópar etja kappi í laufléttum spurningum sem tengjast stangveiði og öðrum náttúrufyrirbærum. Þar sem þetta verður lauflétt föstudagskvöld verður boðið upp á léttar veitingar og kaffi fyrir þá sem kjósa, auk þess sem eitthvað til að maula verður á boðstólum. Það verður spennandi að sjá hvernig þessi nýlunda fellur félagsmönnum í geð.

Að vanda koma Ármenn og fjölskyldur þeirra saman þegar vorar, að þessu sinni 18. apríl og fagna vori á árlegum Vorfagnaði félagsins en helgina þar á eftir stefna Ármenn í sína árlegu Hlíðarvatnshreinsun í Selvoginum þar sem óþurftir verða plokkaðar og dyttað að Hlíðarseli.

Aðrir viðburðir í félagsheimili okkar sem aðrir aðilar standa fyrir í samvinnu við eða í skjóli félagsins munu verða auglýstir sérstaklega þegar nær dregur. Félagið hefur oft skotið skjólshúsi yfir verðug málefni og samkomur og að þessu sinni eru nokkrar slíkar í deiglunni.

Að þessu sögðu, þakkar stjórn félagsins fyrir liðið ár og vonast til að dagskrá og starf félagsins það sem eftir lifir vetrar höfði til og njóti aðsóknar félagsmanna.

Stjórn Ármanna

Skildu eftir svar