Veiðisvæði

Ármenn hafa á sínum snærum tvö föst veiðisvæði; Hlíðarvatn í Selvogi og vötnin sunnan Tungnaár, Framvötnin.

Saga Ármanna við Hlíðarvatn spannar áratugi og vatnið hefur oft verið kallaður heimavöllur Ármanna og félagsmenn hafa viðað að sér mikilli þekkingu á vatninu og lífríki þess. Við vatnið stendur veiðihús félagsins, Hlíðarsel.

Vötnin sunnan Tungnaá að Fjallabaki ganga yfirleitt undir heitinu Framvötn og þar veiða Ármenn gjaldfrjálst sem félagsmenn. Þótt vötnin hafi ekki verið lengi innan vébanda Ármanna, þá hafa félagsmenn áratuga reynslu af mörgum þeirra.

Auk ofangreindra vatna leitast félagið við að bjóða félagsmönnum áhugaverða veiði á hagstæðum kjörum eftir því sem til boða stendur hverju sinni.

Sumarið 2019 býðst Ármönnum t.d. veiði í Eystri Rangá frá 15. júní til 27. júní, Fossá í Þjórsárdal ofan Hjálparfoss frá 10. maí til 10. júní og neðan Hjálparfoss frá 10. maí til 30. september. Ytri Rangá stendur félögum einnig til boða, ofan Árbæjarfoss frá 5. apríl til 20. ágúst og neðan foss frá 5. apríl til 25. maí. Verðin á þessum svæðum eru sérverð fyrir Ármenn og eiga væntanlega ekki eftir að sjást í almennri sölu.